Ўзбекистон Кинематография агентлиги маълумотига кўра, 12-18 декабрь кунлари Қозоғистоннинг Олма-ота шаҳрида XVI «Евроосиё» («Eurasia international film festival») халқаро кинофестивали бўлиб ўтди. Унда ўзбекистонлик бир гуруҳ кино ижодкорлар ҳам иштирок этдилар.

Хусусан, кинорежиссёр Али Ҳамроев «Марказий Осиёда кино санъати ривожига қўшган ҳиссаси учун» номинацияси совринини қўлга киритган бўлса, кинорежиссёр Қамара Камалова «Йўл бўлсин» бадиий фильми учун ҳакамлар ҳайъатининг махсус мукофотига лойиқ кўрилди. Шунингдек, Ўзбекистон Кинематография агентлиги бош директори Фирдавс Абдуҳолиқов «Евросиёда фестиваль ҳаракатини ривожлантиришга қўшган ҳиссаси учун» махсус соврини билан тақдирланди.

Фестиваль доирасида Ўзбекистон Кинематография агентлиги бош директори Қозоғистон Республикаси Маданият ва спорт вазири ўринбосари Нуркиса Дауешов, Қозоғистон Кинематографияни ривожлантириш маркази директори Есетжан Косубаев ва «Кинопарк» энг йирик кинотеатрлар тармоғи раҳбари Ерлан Бухарбаев билан учрашувлар ўтказиб, ўзаро ҳамкорликда олинадиган кино лойиҳалар, кино санъати ва саноатининг бошқа йўналишларида амалга ошириладиган ишларни атрофлича муҳокама қилди.

Мазкур тадбирдаги яна бир аҳамиятли воқеа шундан иборатки, фестиваль доирасида бўлиб ўтган ўзаро учрашувда Бутунроссия Давлат кинематография институтининг Тошкент филиали ва Турон университети ўртасида Ҳамкорлик меморандуми имзоланди, деб хабар беради «Дунё» АА.

Ҳужжатда талабалар ўртасида ўзаро ҳамкорлик лойиҳаларини, ўқув курсларини, илмий конференция ҳамда ўқув дастурларини, маҳорат дарсларини ташкил этиш, педагог ва талабалар алмашиш амалиётини қўллаш ҳамда ҳар икки олий даргоҳнинг дипломларини Ўзбекистон ва Қозоғистонда тан олинишини таъминлаш кўзда тутилган.

Маълумот ўрнида: «Евроосиё» халқаро кинофестивали Қозоғистонда 1998 йилда ташкил этилган бўлиб, у Халқаро кинопродюссерлар уюшмалари федерацияси (FIAPF) томонидан аккредитациядан ўтказилган.