Кинематография агентлиги матбуот хизмати маълумотига кўра, Дилшодбек Усмонов «Монтаж» қисқа метражли фильми билан «Mumbai Entertainment International Film festival India» фестивалида «Энг яхши эркак режиссёр» номинациясида ғолиб бўлди.
Фильм сценарий муаллифи Ҳуснулло Жомонқулов, постановкачи режиссёр Дилшодбек Усмонов, постановкачи оператор Камолиддин Зиёвуддинов, постановкачи рассом Рустам Шоянов, картина директори Илҳом Абсаломов, бадиий раҳбар Тўйчи Аҳмедов.
Шунингдек, мазкур фильм «Дебют» фестивалининг II даражали «Гран при» мукофотига сазовор бўлган. Гонконгдаги олий ўқув юртлари ўртасидаги «Global University Film Awards-2022» фестивали, Австрия пойтахти Вена шаҳрида бўлиб ўтган «Vienna International Film Awards» кинофестивали, «Москва премьераси» халқаро кинофестивали, Марокашда ўтказилган VII «Tetauon» халқаро фильм мактаблари кинофестивали, Қозоғистондаги «Бастау» бутун дунё талабалари ҳамда дебютантлари кинофестивалида иштирок этган ва турли йўналишларда тақдирланган эди.
Бундан ташқари, кинокартина Бразилияда ўтказилган «Campinas film festival 2022»нинг «Энг яхши халқаро қисқа метражли фильм» мукофоти соҳиби бўлган эди.
