Анжуманда сўзга чиққанлар таъкидлаганидек, Ўзбекистон чарм-пойабзал саноати сўнгги 6 йил ичида улкан сакрашни амалга ошириб, Марказий Осиё ва МДҲда етакчи ўринларни эгаллади. Осиё минтақасида «Made in Uzbekistan» бренди остидаги чарм-пойабзал маҳсулотлари ишончли тарзда ўз ўрнини топиб, кўплаб, жумладан, минтақанинг етакчи ишлаб чиқарувчи давлатлари билан рақобатлаша бошлади. Шу билан бирга, мамлакатни янада ривожлантириш учун ҳали катта захиралар мавжуд. Бу борада жаҳон брендларини Ўзбекистонга кенг жалб этиш, Ўзбекистон чарм-пойабзал саноатини жаҳон миқёсига интеграциялаш долзарб масаладир.

Шу нуқтаи назардан, халқаро анжуман Ўзбекистоннинг жаҳон чарм-пойабзал саноатига интеграциялашуви йўлидаги амалий қадамлардан биридир. Тадбирда АҚШ, Италия, Германия, Туркия, Хитой, Россия ва бошқа мамлакатларнинг маҳсулотни сертификатлаш бўйича нуфузли халқаро ташкилотлари, халқаро кўргазмалар ва миллий чарм-пойабзал ассоциациялари вакиллари иштирок этди.

Бугун Ўзбекистон пойабзал саноати нафақат арзон нархларда, балки сифатли маҳсулотлар ишлаб чиқараётганини барчага яна бир бор исботлади. Корхоналарда жаҳон ишлаб чиқариш стандартлари жорий этиб бориляпти. Атроф-муҳит ва меҳнатни муҳофаза қилиш, ишчилар учун муносиб шароитлар яратиш ва стратегик бошқарув алоҳида устуворликларни ўз ичига олади. Буларнинг барчаси бошқа кўплаб глобал брендларнинг қадриятларига мос келади.

Чармсаноат йўналишида Ўзбекистон бутунлай янги босқичга кўтарилгани алоҳида қайд этилди, деб хабар беради «Ўзчармсаноат» уюшмаси матбуот хизмати.