Тожикистоннинг энергия таъминоти билан боғлиқ вазият қўшни Ўзбекистондан электр энергияси етказиб берилиши билан бироз яхшиланди, деб хабар берди мамлакат Энергетика ва сув ресурслари вазирлиги “Азия Плюс” нашрига.
Ҳозирда Тожикистон кунига 2 миллион кВт/соатгача электр энергияси оляпти, агар Ўзбекистоннинг қуввати ошса, таъминот ҳажмининг ортиши кутилмоқда.
Бундан ташқари, Энергетика вазирлиги энергетика вазирлари даражасида Қозоғистон ва Туркманистондан электр энергияси етказиб бериш бўйича дастлабки келишувларга эришилганини маълум қилди. Ҳозирда ушбу мамлакатлардан таъминот билан боғлиқ техник муаммоларни ҳал қилиш бўйича ишлар олиб борилмоқда.
Тожикистон ташқи бозорларга фақат мамлакатнинг жануби-ғарбий қисмида Ўзбекистон электр тармоғи (500 кВт қувватга эга Регар-Гузар электр узатиш линияси) орқали кириш имкониятига эга. Туркманистон ва Қозоғистон электр энергияси транзитини таъминлаш учун Ўзбекистон электр тармоғининг қувватини ҳисобга олган ҳолда мувофиқлаштириш зарур.
Энергетика вазирлиги бу каби муаммоларни автоматик равишда ҳал қилиш имконини берувчи Тожикистон энергетика тизимининг Марказий Осиёнинг Ягона энергия тизими доирасида параллел ишлаши республиканинг шимолий линиялари минтақавий “энергия ҳалқаси”га улангандан сўнг йўлга қўйилиши маълум қилинди.
2026 йилнинг биринчи чорагида Тожикистоннинг Ягона энергия тизимига тўлиқ уланиши кутилмоқда, деб хабар берди asiaplustj.info.
