Жорий йил 10 декабрда пойтахтимизда Республика тармоқлараро саноат ярмаркаси бошланди.
Ўзбекистон Республикаси Вазирлар Маҳкамаси, Ўзбекистон Республикаси Инвестициялар, саноат ва савдо вазирлиги ҳамда Тошкент шаҳар ҳокимлиги кўмагида ташкил этилган ярмарка 13 декабргача давом этади. Ҳар йили ўтказиладиган мазкур тадбир давлат, бизнес ва инвесторлар ўртасида кооперация алоқаларини мустаҳкамлаш учун муҳим майдонча сифатида ўз аҳамиятини тасдиқлаяпти.
Ўзбекистон Республикаси инвестициялар, саноат ва савдо вазири Лазиз Кудратов қутлов сўзида республика саноат салоҳиятини ривожлантириш ва модернизация қилиш, янги иш ўринлари ва бизнес лойиҳаларни ишлаб чиқишнинг стратегик воситасига айланган ярмаркани ўтказиш муҳимлигини таъкидлади.
Бу йил ярмаркада 4 627 дан ортиқ корхоналар қатнашиб, 6 мингдан кўпроқ турдаги маҳсулотни намойиш этиляпти. Ушбу маҳсулотлар саноатнинг машинасозликдан тортиб тўқимачиликгача, кимё саноатидан электроника маҳсулотларигача бўлган турли соҳаларини қамраб олади. Ярмарка Ўзбекистоннинг ички иқтисодиётни ривожлантириш, кичик ва ўрта бизнесни қўллаб-қувватлаш ва миллий ишлаб чиқарувчиларнинг халқаро бозорлардаги позицияларини мустаҳкамлашга қаратилган стратегик йўналишини яққол акс эттиради.
Ярмарканинг муҳим йўналишларидан бири бу тиббий ускуналар, кимёвий катализаторлар ва саноат ускуналари каби ишлаб чиқарилаётган 80 дан ортиқ импорт қилинган аналоглар билан бемалол рақобат қила оладиган янги маҳсулотларни илгари суришдир.
Ташкилотчилар инклюзивлик ва ижтимоий масъулиятга катта эътибор қаратган. Илк бор ярмаркада имконияти чекланган шахсларни қўллаб-қувватловчи корхоналар учун махсус жой ажратилди. Ушбу секторда 43 та компания томонидан 350 дан ортиқ маҳсулот намойиш этиляпти.
Ярмарканинг кўргазма қисми билан бирга, B2B ва B2G форматидаги музокаралар учун ҳам майдон бўлиб хизмат қиляпти. Дастлабки маълумотларга кўра, умумий қиймати 6,5 триллион сўм бўлган 2 700 га яқин келишув имзоланиши кутиляпти. Ушбу келишувлар йирик тармоқлараро лойиҳалардан тортиб, иқтисодиётни модернизация қилиш ва диверсификация қилишга қаратилган хусусий инвестиция ташаббусларигача бўлган йўналишларни қамраб олади, деб хабар беради Инвестициялар, саноат ва савдо вазирлиги матбуот хизмати.
Ярмарканинг яна бир муҳим жиҳати – бу нафақат мавжуд ютуқларни, балки Ўзбекистон саноатини ўзгартиришга қаратилган узоқ муддатли лойиҳаларни намойиш этишдир. Хусусан, 2025 йилгача амалга оширилиши режалаштирилган умумий қиймати 80 триллион сўм бўлган 2 158 дан ортиқ ташаббуслар тақдим этиляпти. Бу лойиҳалар саноат кооперациясини ривожлантириш, экспорт салоҳиятини ошириш ва янги иш ўринларини яратишга қаратилган.
