Бу ҳақда France 24 ахборот агентлиги Осакадаги Китано тиббий тадқиқот институти шифохонаси оғиз бўшлиғи жарроҳлиги бўлими бошлиғи Кацу Такахашига таяниб ёзмоқда.
Унинг жамоаси октябрь ойида Киото университети шифохонасида клиник синовларни бошлади. Катта ёшли кўнгиллиларга яширин тишларнинг ўсишини рағбатлантириш учун экспериментал антитаначаларга асосланган дори воситаси берилмоқда. Олимлар тушунтирганидек, одамларда фақат иккита тиш тўплами (сут ва доимий) ўсади. Бироқ, Кацу Такахашининг сўзларига кўра, тишларнинг учинчи авлодининг “ҳаракатсиз” куртаклари тиш гўшти остида яширинган.
Тишларни протезлаш (кариес, касаллик ёки шикастланиш оқибатида йўқолган) катта харажатни талаб қиладиган жараён ҳисобланади. Табиий тишларни тиклаш арзонроқ бўлади ва бемор учун камроқ ноқулайлик туғдиришига япон олимларининг ишончи комил. Олти ёки ундан ортиқ доимий тишлари йўқолган болаларга ёрдам бериш стоматологлар олдида турган устувор вазифалардан саналади.
Сичқонлар ва сассиқкўзанлар устида синовнинг биринчи босқичи 11 ой давом этди. Таклиф этилаётган препарат интраутерин сенсибилизация (USAG-1) билан боғлиқ, тиш ўсишини бостирадиган ген-1 оқсилини ўчиради. USAG-1 нинг бошқа оқсиллар билан ўзаро таъсирини блоклаш суяк морфогенетик оқсили (BMP) сигналини рағбатлантиради, бу эса янги суяк шаклланишига олиб келади. Бу сичқонлар ва сассиқкўзанларнинг оғиз бўшлиғида янги тишларнинг юзага келишига олиб келди, улар одамлар билан деярли бир хил USAG-1 хусусиятларига эга, деб хабар беради rbc.ru.
