АҚШ президенти Жо Байден, агар Теҳрон бомба яратишга яқинлашса, Эроннинг ядровий иншоотларига зарба беришни кўриб чиқди. Бу ҳақда Axios 2 январь, пайшанба куни учта хабардор манбага таяниб хабар берди.
“Оқ уйнинг миллий хавфсизлик бўйича маслаҳатчиси Жейк Салливан президент Байденга, агар эронликлар 20 январгача (Трамп инаугурацияси куни) ядровий қурол яратиш йўлида қадам ташласа, АҚШнинг Эрон ядровий объектларига эҳтимолий ҳужуми вариантларини тақдим этди”, дейилади нашр хабарида.
Қайд этилишича, бу бир неча ҳафта олдин содир бўлган, бироқ ҳозирча учрашув сирлигича қолиб келган. АҚШнинг Эрон ядровий дастурига зарба бериш Америка президентининг авантюраси бўлиши мумкин эди ва у Эронга ядро қуроли ишлаб чиқишга имкон бермасликка ваъда берганди, аммо у шунингдек ўз ворисига янги можаро хавфини қолдириб кетиши мумкин.
Байден ва унинг миллий хавфсизлик бўйича гуруҳи турли хил вариантлар ва сценарийларни муҳокама қилишган, бироқ президент бирорта ҳам якуний қарор қабул қилмаган.
Ушбу масаладан хабардор бўлган АҚШ расмийсининг айтишича, Оқ уйдаги учрашув янги разведка маълумотлари билан боғлиқ эмас ва Байденнинг аниқ қарори билан якунланиши кўзда тутилмаган. У Эрон 20 январгача уранни 90 фоизгача бойитиш каби чораларни кўрса, АҚШ қандай жавоб бериши кераклиги ҳақидаги сценарий муҳокамасининг бир қисми эди.
Яна бир манбанинг хабар беришича, ҳозирда Оқ уйда Эрон ядровий иншоотларига қарши эҳтимолий ҳарбий ҳаракатлар ҳақида фаол муҳокамалар олиб борилмаяпти.
Аммо Байденнинг баъзи асосий ёрдамчилари икки тенденция – Эрон ядро дастурининг тезлашиши ва Эрон ҳамда уни қўллаб-қувватловчиларнинг Исроил билан урушда заифлашиши – Байденни зарба беришга ундаши мумкинлигини таъкидламоқда.
Декабрь ойида МАГАТЭ Эронда 60 фоизгача бойитилган уран етарли даражада эканини, бу тўртта ядро каллаклари учун етарли бўлишини маълум қилган эди, деб хабар беради korrespondent.net.
