Бугун Ўзбекистон ташқи ишлар вазири Бахтиёр Саидов ҳамда Хитой ташқи ишлар вазири Ван И муҳим Битимни имзолади.
Бу ҳақда Бахтиёр Саидов ўзининг телеграм каналида маълум қилди.
Битимга кўра, эндиликда Ўзбекистон ва Хитой фуқаролари ҳар икки мамлакатга 30 кун давомида визасиз саёҳат қилиш имконига эга бўлади.
"Бу ҳужжат алоқаларимизни янада фаоллаштириш, савдо айланмасини ошириш ва халқлар ўртасидаги муносабатларни ривожлантириш йўлидаги яна бир муҳим қадамдир", деб ёзади вазир.
Айни кунларда Ўзбекистон ҳукумат делегацияси Хитойда бўлиб турибди. Делегация таркибида «Ўзчармсаноат» уюшмаси ҳам Хитойнинг Ченду шаҳрида бўлиб ўтган Ўзбекистон-Хитой бизнес форумида иштирок этди. Ушбу ташриф давомида икки давлат ўртасидаги савдо-иқтисодий ва маданий алоқаларни янада мустаҳкамлаш масалалари кўриб чиқиляпти.
Жорий йил 21 ноябрда Ўзбекистон Республикаси Инвестициялар, саноат ва савдо вазири Лазиз Кудратов Хитой Халқ Республикаси Экспорт-импорт банки вице-президенти Янг Донгнинг бошчилигидаги делегация билан учрашди.
